Die Departement van Landbou het in 1954 die fisiese en genetiese status van plantmateriaal geïdentifiseer as die belangrikste faktore om by te dra tot die verhoging van landbouproduksie in Suid-Afrika. In 1964 is die Suid-Afrikaanse Plantverbeteringsvereniging op die been gebring om spesifiek aandag te gee aan hierdie aspekte van plantmateriaal vir die wingerd- en sagtevrugtebedrywe. Die destydse Departement van Landbou se kwarantynfasiliteit in Stellenbosch het aanvanklik die variëteite (waarvan baie vandag nog gebruik word) gesellekteer en getoets om virusvrye klone te identifiseer en beskikbaar te stel aan die bedryf.

Die aanvanklike Wyndruifverbeteringsvereniging (WVV) is in 1986 gestig. Intussen het die Departement van Landbou in 1988 besluit dat hulle nie meer alleen verantwoordelikheid vir die bestuur van plantverbetering kon neem nie. Na aanleiding hiervan is die Suid-Afrikaanse Plantsertifiseringskema vir Vitis in 1992 onder die Plantverbeteringswet, 1976 (Wet nr. 53 van 1976) afgekondig. Die kwekers en produsente het sedert 1993 volwaardig lede van die WVV geword.

Tafel- en droogdruiwe is aanvanklik saam met sagtevrugte binne die Sagtevrugteplantsertifiseringskema hanteer. Daar is egter in November 2017 deur die twee Rade gesamentlik besluit om alle wingerdmateriaal binne die WVV raamwerk te bestuur.

Die Skema is nie verpligtend nie en deelname deur enige organisasie wat plantmateriaal teel, invoer of vermeerder, enige kweker of enige produsenteliggaam is geheel en al vrywillig. Feitlik alle wyndruifstokke word gesertifiseer, terwyl nagenoeg 90% van droogdruif- en 60% van tafeldruifstokke binne die Skema hanteer word.

Om die belange van die lede te bevorder deur plantverbetering en plantsertifisering van wingerdvoortplantingsmateriaal in belang van die Suid-Afrikaanse wyn-, tafel- en droogdruifbedrywe te onderneem.

Om die bevoegdhede, die verrigting van werksaamhede en uitvoering van die pligte wat kragtens die SA Plantsertifiseringskema vir Vitis, ingevolge die Plantverbeteringswet, 1976 (Wet nr. 53 van 1976) aan die Uitvoerende Raad as gesag verleen, toegewys of opgedra is, uit te oefen.

---

---

---

---

---

---

---