Die Departement van Landbou het in 1954 die fisiese en genetiese status van plantmateriaal geïdentifiseer as die belangrikste faktore om by te dra tot die verhoging van landbouproduksie in Suid-Afrika. In 1964 is die Suid-Afrikaanse Plantverbeteringsvereniging op die been gebring om spesifiek aandag te gee aan hierdie aspekte van plantmateriaal vir die wingerd- en sagtevrugtebedrywe. Die destydse Departement van Landbou se kwarantynfasiliteit in Stellenbosch het aanvanklik die sagtevrugte en wingerd variëteite (waarvan baie vandag nog gebruik word) gesellekteer en getoets om virusvrye klone te identifiseer en beskikbaar te stel aan die bedryf.

Die Suid-Afrikaanse Plantverbeteringsorganisasie (SAPO) is in 1974 deur die Sagtevrugte-, Inmaakvrugte- en Droëvrugte Rade gestig met die doel om verbeterde plantmateriaal aan die industrie te voorsien. Die Sagtevrugtebedryf het vinnig uitgebrei en daar is ook twee onafhanklike Plantverbeteringsorganisasies geregistreer - TopFruit in 1983 en Stargrow in 1992. Intussen het die Departement van Landbou in 1988 besluit dat hulle nie meer alleen verantwoordelikheid vir die bestuur van plantverbetering kon neem nie. Na aanleiding hiervan is die Sagtevrugteplantsertifiseringskema in 1993 onder die Plantverbeteringswet, 1976 (Wet nr. 53 van 1976) afgekondig.

Die Skema is nie verpligtend nie en deelname deur enige organisasie wat plantmateriaal teel, invoer of vermeerder, enige kweker of enige produsenteliggaam is geheel en al vrywillig. Die groter meerderheid van teelprogramme word wel deur die geregistreerde Plantverbeteringsorganisasies bestuur en die meeste boomkwekers is lede van die Sagtevrugteplantsertifiseringskema. Die Inspeksiedienste van die Nasionale Departement van Landbou (NDL) is ten volle verantwoordelik vir alle materiaal wat nie binne die Skema gesertifiseer is nie. Die NDL Inspekteurs moet alle ongesertifiseerde bome inspekteer om seker te maak dat daar wel aan die minimum fisiese- en fitosanitêre standaarde van die Wet voldoen word. Hulle is ook verantwoordelik daarvoor om seker te maak dat die bome tipe-eg is. Die NDL Inspekteurs is die enigste gesag wat amptelik verkope van bome wat nie aan die standaarde voldoen nie kan verbied.

Om die maksimum gebruik van gesertifiseerde sagtevrugtevoortplantingsmateriaal deur alle sektore van die sagtevrugtebedryf te bevorder.

Om die bevoegdhede, die verrigting van werksaamhede en uitvoering van die pligte wat kragtens die Sagtevrugteplantsertifiseringskema, ingevolge die Plantverbeteringswet, 1976, (Wet nr. 53 van 1976) aan die Uitvoerende Raad as gesag verleen, toegewys of opgedra is, uit te oefen.

---

---

---

---